அலைக்குமிழ்

உறவுகள் விளிம்பில் நிற்கின்றன. 

அவ்வாறே இருக்கட்டும் 

நெருக்கம் தவிர் இறுக்கம் தவிர் 

மெல்லிய சிறு சிறு வலை பின்னி 

அதனுள் அமர்ந்துகொள் 

ஒரு சிலர், வெகு சிலர் உடனிருந்தால் போதும் 

நிற்க 

 வலையும் ஒருநாள் அவிழும் 

காற்றினில் கரையும் 

அலைக்குமிழ் வெடித்து 

ஆழ்கடல் புகும்  

நேரம் 

இது ஒரு நல்ல சேலை என்று 

விரல்களால் நீவிவிட்டு 

திருப்தியாக மடித்து வைப்பது போல் 

இது ஒரு நல்ல நட்பு 

என்று சில கணங்களை மனதில் நிறுத்தி 

சிலாகிப்பது போல் 

இது ஒரு நல்ல பாடல் என்று 

வரிகளை மனதில் ஒட்டி

ரசித்து மகிழ்வது போல் 

இது ஒரு நல்ல வாழ்க்கை என்று 

விலகி நின்று பார்க்கும் 

நேரம் நெருங்கி விட்டது